Transferem Mani

Ol risk

Olsem yu save luk long websaet ia, i gat fulap aktiviti we yu save mekem onlaen we, sapos yu no tekem smol kea, bae ol frodsta oli save yusum blong spolem yu. Ol skam we oli hapen oli save tekem ples taem yu stap traem blong pem o salem ol guds mo ol sevis, o oli save pleple wetem ol mein filing blong yu olsem ol filing blong yu stap wantem blong mekem moa mani, o faenem lav. Mifala i gat ol pej we oli gat ol stret ditel long hao blong luksave mo no kasem ol skam, be hem ia hem i sam long ol nomol wan we ol frodsta i save yusum ol mani transfe sevis long wan wei we i no stret blong traem blong stilim mani blong ol viktim:

• Ol advans fi/ pripeimen skam, we ol frodsta i ak olsem ol ripresentetif we oli kam long ol giaman lon kampani, oli yusum ol dokumen we oli luk olsem ol tru wan, ol imel mo ol websaet blong oli luk olsem oli stap folem loa mo oli jajem ol ‘fi’ fastaem bifo yu save tekem lon, we hem i neva hapen.
• Ol inheritens skam, taem we ol frodsta oli stap traem blong pulum tingting blong yu wetem ol promes blong ol invesmen o ol samting we wan man i wantem pasem olsem wan presen long yu bifo hem i ded mo yu mas pem wan fi from.
• Ol mistri soping skam, taem we oli sendem yu wan jek mo talem long yu blong yusum mani long hem blong ‘jekemaot’ wan mani transfe sevis nomo. Jek ia i nomo save proses from i nogat inaf mani long hem, mo naoia yu garem wok blong mas pem bak mani ia gobak long bank.
• Ol ovapeimen skam, taem we wan ‘baia’ i sendem yu, olsem wan sela, wan jek we i luk olsem i tru, blong wan amaon we i hae moa bitim praes we yu bin agri long hem, wetem wan toktok blong eksplenem ovapeimen ia mo rikwestem blong yu transferem bak ekstra mani ia.
• Ol emploimen skam, we oli givim yu wan ‘wok’ o wan janis blong yu wok-long-haus we i gud tumas blong i save tru. Oli sendem yu wan jek we i luk olsem i tru blong kaveremap ol ekspens blong yu stat wok wetem mo askem blong yu transferem bak balans, o askem blong yu pem ol rikruitmen fi mo ol pri-emploimen jek bifo oli givim wok long yu.
• Ol loteri o praes skam we oli kontaktem yu mo talem long yu se yu nid blong sendem wan bigfala mani blong kaveremap ol prosesing fi o ol taks blong yu save kleim long wanem yu bin winim – o taem yu risivim wan jek o mani oda we yu sek long hem, mo oli givim ol toktok we i talem blong yu dipositim mani, mo kwiktaem transferem wan pat blong hem i gobak, mo tu blong kaveremap ol prosesing fi mo ol taks.
• Ol rentel propeti skam, we oli trikim yu blong transferem mani blong kaveremap ol difren fi mo ol diposit from wan propeti we yu wantem blong rentem, o olsem wan landlod, oli sendem yu wan giaman jek blong diposit, mo dil i kansel mo yu transferem diposit ia gobak long man we yu tingse bae hem i rentem propeti blong yu.
• Ol vihikel skam, we oli trikim yu blong transferem mani olsem wan diposit blong oli holem vihikel we yu wantem pem – o blong kaveremap ol ‘shiping fi’ – o olsem wan sela, oli sendem yu wan giaman jek olsem diposit, afta dil i kansel mo yu transferem diposit i gobak long man we yu tingse bae hem i pem wan vihikel long yu.
• Pruf blong peimen skam, we wan man we yu tingse hem i wan landlod o wan man we i stap salem ol ka i askem yu blong sendem mani go long wan famli memba/wan fren olsem pruf se yu gat inaf mani blong rentem wan propeti o pem wan ka. Bae oli rikwestem yu blong sendem wan kopi blong transfe fom blong yu go long olgeta olsem pruf, mo bae olgeta i go garem mani ia yusum wan giaman ID long nem blong man we bae i risiv.
• Ol imejensi/granperens skam, we ol frodsta oli talem se oli sik, o oli kilim hem o oli arestem long wan rong wei mo hem i stap long bigfala nid blong mani we hem i nidim hariap, o oli aktem se oli ol apu blong ol olfala we oli nidim mani.
• Ol onlaen oksen skam, we yu winim wan bid long wan aetem mo oli talem long yu se sela i akseptem peimen nomo tru long mani transfe sevis long wan nem we i giaman, we ‘sela’ i yusum blong mekem wan giaman aedentiti blong save garemaot mani. Long wan nara rod, yu no bin winim aetem ia be wan nara man we i stap givimaot semak dil i kontaktem yu mo askem blong yu transferem mani, blong garem ol guds we i neva stap.
• Ol lav, deiting o rilesensip skam, taem yu statem wan onlaen rilesensip wetem wan man we hem i wan tru frodsta mo hem i trikim yu blong transferem mani blong kavremap wan imejensi o wan visit blong mitim wan man.

Yusum ol mani transfe sevis

• Neva senden mani blong pem ol ‘taks’ o ol ‘prosesing fi’ long ol loteri o ol praes we oli se yu winim.
• Neva yusum wan tes kwisten olsem wan moa sekuriti ak blong protektem transaksen blong yu.
• Neva givim banking infomesen blong yu i go long ol man o ol bisnes we yu no save long olgeta.
• Neva sendem mani fastaem i go long wan man blong yu save garem wan lon o wan kredit kad.
• Neva sendem mani fastaem blong kaveremap ol kos blong wan man we yu tinkse hem i wan employia.
• Neva sendem mani fastaem blong kaveremap eni kaen blong diposit o ol fi from wan vihikel we oli wantem salem o pem.
• Neva sendem mani fastaem blong kaveremap eni kaen blong diposit o ol fi from wan propeti we yu wantem rentem.
• Neva sendem mani from wan imejensi taem we yu no bin konfem se hem i wan tru imejensi.
• Neva sendem mani long wan jek long akaon blong yu kasem i klia ofisiali – we i save tekem wik.
• Neva sendem wan mani transfe from ol samting we yu luk onlaen blong pem.
• Neva openem wan atajmen fom, o klik long wan link, wan imel we yu sek long hem we i stap talem se hem i stap imel kam long wan mani transfe sevis.

Sapos yu ting se yu bin wan viktim blong wan skam

Kolem mani transfe sevis kantri ejen kwiktaem. Sapos yu bin sendem mani be i no kasem risiva yet, yu save stopem transaksen ia.

Mo infomesen

Lukim Western Union konsuma proteksen advaes

Lukim Manigram konsuma proteksen advaes